🪷 殯儀流程全攻略 — 一步一步陪你行

第1步 — 確認死亡、領取文件

喺醫院離世（最常見）：由駐院醫生確認死亡後，去醫院嘅死亡證件辦事處領取三份文件：死因醫學證明書（表格18）、認領遺體證明書、醫學證明書（火葬）。

喺屋企離世：末期病人生前有註冊醫生診斷、離世前14日內有醫生診治嘅話，醫生可以直接簽死因醫學證明書，唔使報死因裁判官、唔使警察介入。突然死亡／死因不明就要即刻報警——遺體會送公眾殮房由法醫檢驗，交死因裁判官跟進。

要呈報死因裁判官嘅情況：死因不明、非自然死亡（意外／自殺／他殺）、可疑死亡、手術期間或麻醉後死亡、羈留期間死亡。呢類個案需時一至六個月，家屬唔使自己辦死亡登記，由死因裁判官裁定死因後發文件。

第2步 — 14日內辦理死亡登記

法例規定（香港法例第174章《生死登記條例》）自然死亡須14日內登記；無合理辯解唔登記，最高可罰款$2,000或監禁6個月。

去聯合辦事處一站式辦理：死亡登記＋火葬申請＋土葬證明書同一個地方搞掂；合資格者可以用「智方便+」網上辦理。

會領到嘅文件：

• 死亡登記證明書（表格12，俗稱行街紙）
• 土葬用：表格10（俗稱土葬紙）
• 火葬用：之後再領火葬許可證（表格3，俗稱火葬紙）

💡 小貼士：呢啲文件全部可以授權持牌殯儀館／長生店職員代辦，唔使樣樣自己跑、自己排隊。

第3步 — 決定殮葬方式

火葬（香港約九成）：經食環署火葬預訂辦事處申請爐期。骨灰可以放龕位、紀念花園撒灰或海上撒灰。

土葬：公眾墳場普通墓地六年後要撿骨（執骨）再火化或遷葬；私營墳場（例如天主教墳場）先有永久墓地。土葬棺木用實木，落葬要六至八名仵工。

綠色殯葬（免費）：紀念花園撒灰或海上撒灰完全免費。食環署設有「綠色殯葬中央登記名冊」，可以生前登記自己嘅心願。

第4步 — 搵殯儀服務

「殯儀館」自己有靈堂；「長生店」冇自己禮堂，會租殯儀館場地。兩者都係持牌殮葬商，都可以一條龍代辦文件、儀式、火化預訂。

💡 法例冇規定一定要守夜——按家庭意願、先人信仰同預算揀就得。

🏛️ 香港殯儀館一覽（地址電話）→
⚰️ 殯儀服務推介 →
🧭 法事查詢（擇日／堪輿）→

第5步 — 安排守夜／出殯

文件齊、死因冇可疑、爐期唔緊張嘅話，由離世到出殯一般約兩星期。死因裁判官個案、等海外親人返港、冬季火化高峰期會更長。

宗教儀式對照：

⚠️ 四種宗教都適合送花籃／花圈，但輓詞一定要跟返宗教——例如向基督教喪禮送「駕鶴西歸」（道教講法）係好常見又尷尬嘅出錯。我哋落單時會同你核對一次先做。

🔍 唔知上款下款稱謂點寫？用稱謂查詢工具 →
🌸 訂悼念花籃／花牌（我哋幫你核對輓詞稱謂）→

💡 花籃最好喺設靈當日下午前送到殯儀館——話低先人名諱同禮堂號，我哋直接送上禮堂。

第6步 — 出殯當日

傳統館出流程：守夜設靈（頭一晚）→ 翌日大殮（瞻仰遺容、封棺）→ 辭靈出殯 → 火葬場／墳場，全程約3至5小時。

當日會見到嘅崗位：堂倌係靈堂司儀／招待，通報來賓、引導致祭；仵工負責一切接觸遺體嘅工作（潔體、更衣、化妝、入殮、扛棺）；經手人／跟單人係殯儀公司負責跟你單嘅職員。

長子／長孫嘅角色：擔幡＝提住長幡燈籠，象徵引領亡靈升天；買水＝盛水回來，大殮日由上而下抹身三次潔淨遺體。

冇長子／長孫點算？實際做法係搵同姓氏嘅兄弟（姪仔、堂兄弟等男丁）代行。真係搵唔到同姓男丁，先至由喃嘸改用「大悲咒水」灑淨代替買水。

賓客須知 — 弔唁禮儀

衣著：黑、白、深藍、深灰為主，包趾鞋；避免鮮色、誇張圖案、華麗首飾。

帛金：用白信封（切勿用利是封），銀碼單數尾加$1（例：$101、$501），個「1」代表只此一次。有啲家屬會註明「帛金敬辭」，即係唔收。

吉儀：家屬回贈嘅白色小信封，內有糖（化解哀苦）、紙巾（拭淚）、一蚊（只此一次）。傳統上唔好帶返屋企——糖當場食、紙巾用完即棄、一蚊散去。

花牌／花圈款式格式：上款＝敬輓對象（先人名諱＋千古／安息），中間＝四字輓詞，下款＝送贈者姓名／機構＋敬輓。

第7步 — 之後嘅日子：拜祭日期＋身後行政

拜祭日子（以逝世當日為第1日計）：

以上按公曆（陽曆）計。有啲家庭跟農曆或者請師傅擇日，請按自己家族做法核實。

身後行政（好多家屬唔知要做）：

• 整理資產負債清單：銀行戶口、物業、股票、保險、強積金、債務。
• 銀行戶口一經身故即凍結，要向高等法院遺產承辦處申請遺囑認證書（有遺囑）或遺產管理書（冇遺囑）先解凍。
• 簡易程序：遺產總值≤$50,000且全部係銀行現金，可申請「確認通知書」代替正式授予書；民政事務總署有免費諮詢。
• 保險：有指定受益人嘅人壽保險，受益人可直接索償，唔使等遺產承辦。
• 強積金：向積金局查先人戶口，由遺產代理人申領。
• 查唔到先人有咩資產：可向銀行／保險／證券行發查詢信、土地註冊處查物業、遺產承辦處查遺囑紀錄。

🔔 唔記得計日子？交畀我哋幫你記

頭七、尾七、百日、對年——喪禮之後嗰段日子好容易數漏，而且嚟得比想像中快。登記做會員，話低先人離世日期，我哋會幫你計好晒四個日子，每個日子前發email提你，唔使喺最傷心嗰段時間仲要記住呢啲嘢。

• 幫你計好 頭七 · 尾七 · 百日 · 對年 嘅實際日期
• 每個日子之前發email提你
• 要訂花拜祭嘅話，資料已經留低，一撳就落到單
• 隨時可以取消提醒或者要求刪除資料

日期按公曆計，僅供提示參考——如果貴府跟農曆或者請師傅擇日，請以家族做法為準，我哋嘅提醒淨係幫你唔好數漏。

頭七、尾七、百日、對年前後想安排超渡、化怨親債主或者立墓碑？可以睇返我哋嘅玄學服務轉介 →

邊度辦理？官方部門一覽

地址、辦公時間、預約安排會不時更新——出門前請先上官網或打政府熱線 1823 確認。以下大部分手續都可以授權持牌殯儀館／長生店代辦。

殯儀單常見術語速查

殯儀報價單成堆行內術語，以下係家屬最常問嗰啲。

常見問題